اتجهزي معابا للعيد ♥♥ ج١

                                                                        

السلام وعليكم ادري قبل كم ساعه عملت بوست بس مرره متحمسه 

وانا احس انو لازم اعمل هالبوست وانو راح يفيد كثير بنات سو انشاءالله تستفيدو وهوا باين من عنوانو

راح يكون اسم السلسه اتجهزي معايا للعيد وراح تكون ع ثلاثه اجزاء الاول اللي هوا ذا راح يكون سكن كير 

و العنايه بالبشره والجسم 

والجزء الثاني حيكون تنسيقات وراح اعملو اليوم و اخر جزء راح يكون عن الميك اب و<< مايحتاج افصل يعني البيوتي رح اعطيكم افكار ،

نبدأ :

اول: شي اعملي ماسكات لبشرتك انا عندي اثنين كلهم من بيزلين 

الاول صنفرة والثاني قناع للتفيتح وممكن تجربي حقت بودي شوب او لاش وفي كثير ماسكات ممكن تسوي في البيت

ونهتم بتقشيرها وترطيبها 

ثاني شي: اللي هوا الشفايف 

لازم نهتم بتقشيرها وترطيبها انا عندي مقشر الشفايف اللي من ذي بودي شوب وبمجرد انتهائي من التقشير ارطب شفايفي بجل جونسون هوا تقريبا زي فازلين قوامه ثقيل ، او ارطب بفازلين 

ثالث شي تقشير الجسم : انا عندي مقشر الجسم اللي من اتش اند ام هوا مقشر عادي قوامه جل ريحتو عاديه

واستخدم مقشر الرجول "اكرمكم الله " اللي من ذي بودي شوب مررره منعش وحلو بريحة الببريمينت " النعناع وافرك رجلي بلفرشه ولا الحجر حق الرجول ماعرف اسمها بس هيا اللي انتو شايفينها في الصوره برضو من ذا بودي شوب 

رابع شي الترطيب : راح اتكلم اول شي عن ترطيب الجسم بعدين القدمين ،
انا ارطب جسمي كل بزبدة الكاكو لانو نوعية بشرة جسمي جافه بس اليدين ارطبهم بلوشن الجسم اللي من باث اند بودي حق باريس زي مانتو شايفين ع غلاق اانا استخدمو ليديني مع الزنود عشان ماحب لمن يدي تكون مرره مدهنه من الزبده
واللوشن الثاني الاحمر مدري ايش اسمو بس انا استخدمو احيانا بدون الزبده يعني لحالو

خامس شي ترطيب القدمين : ودحين نجي للترطيب القدمينن بعد التقشير ابخ من سبراي القدم برضو من نفس المجموعه حقت النعناع ، كذا يعطي انتعاش وتحسي رجولك بارده مدري ماعرف اوصف وكمان حلو اذا مشيتي فتره طويله وحسيتي رجولك تعبانه هذا وظيفتو كذا ينعشها ويبردها اسمو كولدنج فوت سبراي ترا مرح حلو وسعرو رخيص سبعة وعشرين ، وبعد كذا استخدم جل جونسون او فازلين و ع الاظافر استخدم زيت الاظافر تلاقيه في اي مكان اانا لقيتو في السوبرماركت  وبس البس شراب واقعد لين اليوم الثاني

سادس شي العنايه باليدين : صوره جماعيه بس

شوفو محتويات الشنطه الصغيره هذي من اتش اند ام بس الزيت حق الاظافر مو معاه

واخيرا وليس اخرا كريمات اليد اللي حاليا بستخدمهم اول واحد من اليمين من باث اند بودي حطيتو في مشترياتي هنا

استخدمو قبل مانام لانو ثقيل ، و اللي في الوسط دوف استخدمو طول اليوم عادي كل ماحسيت يدي نشفت استخدمتو 

واخر شي كريم من ذا بودي شوب بزيت اللوز مره حلو الكريم واستخدمو مرتين عشان احافظ ع ترطيب اظافري بس هوا مو بس للاظافر لا حتى لليد 

اما بالنسبه للتقشير فانا استخدم نفس مقشر الجسم كمان ليدي 

 ، 

وسادس او سابع "مادري" شي الشعر انا كتبت تدوينه للحفاظ ع الشعر هنا♥

اما بالنسبه للترطيب بعد الششاور فانا استخدم بديل الزيت المعالج للشعر من دوف و سيروم ادمجهم مع بعض واحطهم

واخر شي يعني كنصيحه مو لازم تسويها ممكن او يوم العيد تستخدمي شاور جل بريحه

انا عندي ذولا الاثنين من باث اند بودي  اتكلمت عنهم في مشترياتي  هنا ي روايح كثير انتي اختاري اللي تبغي وموشر من باث اند بوي 

وبس 

دمتم بسعاده يارب اي سؤال اسئلوني في الاسك وتابعوني في تويتر والفيس بوك وفضلا ليسا امرا اشتركو في البلوق حقي ،،، باي http://ask.fm/raneem372

https://twitter.com/irjojoor

www.facebook.com/raneemRm

حافظي علي شعرك ♥♥ Keep your hair

السلام وعليكم كيفيكم 

انشاءالله بخير ،

قرب العيد و باقي تسعه ايام و اكيد كلنا نبغا شعرنا صحي و مو متشابك 

هيا التدوينه دي موشرط اني بس تطبيقيها عشان العيد اعمليها كمان بدون مايكون عشان العيد لانو اصلا لازم نهتم بشعرنا انا زمان ماكنت اهتم بس بعد الاستحمام احط كريم مرطب ( انا طبيعة شعري خشن جاف لكن مو مره وكثيف جدامشاءالله  فعملت الكيراتين وبعدو شعري سار يتساقط بشكل مره كبير لاحظت انو بيتساقط كثير لمن بستخدم الشامبو حقو فبطلت استخدمو  وماقول شعري بعدو اتحسن لا بس قل التساقط وسرت اهتم بغذائي سرت اكل خضروات وفواكه يعني اكل صحي و اسوي حمام زيت اللي راح اقولها لكم انشاءالله في دا البوست وبس ) 

طيب بعد المقدمة الطويله العريضه راح ابدأ ،

انا اسوي حمام زيت مرتين في الاسبوع واخليه في شعري مده طويله اقل شي نص ساعه 

طيب جيبي زبدية عشان تخلطي فيها الخلطه << اكيد يعني اجل بيدنا بنخلط!!

ماعليه ،

انا ماراح اقولكم المقادير لانو ع حسب طول وكثافة شعرك ،

حطي عسل

ومايونيز ( يفضل كامل الدسم ) ،

وبيضه 

و الزيت اللي تحبي 

انا عن نفسي استخدم ثلاثه انواع " زيت الخروع وزيت باراشوت وزيت الزيتون ،

وبس هاذي المكونات وطبعا ماننسى نشرب كثير مويا ماقول اشربي ٨ اكواب لا كل ماعطشتي اشربي لا تتكاسلي وموشرط اذا عطشتي عادي بدون واكيد الاكل الصحي والتغذيه السلميه من الداخل هيا اللي حتعكس خارجك ،

و ممكن كمان تستخدمو موز مع الخلطه كمان الموز مره مفيد للشعر اذا حابه تستخدمي اهرسي مضبوط لا تبقي اي حبيبات فيلو ،

وبس هذا كان بوست اليوم اتمنى تكونو استفدتو واي سؤال اسئلوني في الاسك:

http://ask.fm/raneem372

تويتر: https://twitter.com/irjojoor

فيسبوك: www.facebook.com/raneemRm

اشتركو في البلوق :) باي 

♡ Ramadan kreem ♡

السلام وعليكم كيفيكم انشاءالله بخير 

كل عام والجميع بخير ويعينكم على صيامه وقيامه، 

طبعا تعرفو رمضان الناس بس مو الكل تتختن  لقلت الحركة وكثرة الاكل 

وكثير من العناصر الغذائيه المهمه بتكون ناقصه زي الخضروات و الفواكه و مشتقات الحليب

طبعا انا ماتكلم عن الكل يعني البعض ، و مين ماتبغا في العيد جسمها يكون رشيق وحلو وتنسبط فيه 

فانا راح اعطيكم كم نصيحة انشاءالله تستفيدو منها ،يعني التدوينه حتكون تقريبا كلها هرج او مو تقريبا اكيد، 

اول شي الفطور :

اكيد الكل يشتهي جميع الاكلات منها الحلويات والسمبوسه والشوربه وغيرها كثير ،

السمبوسه مين فينا مايحبها 

هيا لذيذة لكن نحاول نقلل منها يعني اذا انتي مره مشتهيتها خذي حبه وبالكثير حبتين 

ونحاول كمان تكون الحشوه صحية ومافيها زيت كثير وياريت اذا كانت مشويه 

، اما بالنسبه للاكلات الثانيه نفس الشي اذا اشتهيتيها خذي لكن على قد نفسك لا تكثري 

ثاني شي اللي هوا وجبه خفيفة او سناك :

لازم تاكلي سناك عشان تفضل عملية الهضم مستمره 

كلي اشياء مفيدة مثلا لبن زبادي مع خضروات قطعيها بالطول واغمسيها باللبن

او اشربي لبن مع تمر او تمر لحالو 

انا عن نفسي اكل عسل سدر باشمع 

او اشرب لبن مع تمر او اني اقطع فواكه واكلها 

و ممكن كمان اكل خضروات يعني اشياء صحية  ،

ثالث شي الرياضه :

لا تهمليها ابدا تبي جسمك رشيق وراضيه عنو سوي رياضه 

عندك اوقات كثير ممكن قبل الفطور بساعه او حسب مدتك للرياضه اللي تعمليها

او ممكن بعد الفطور بساعتين - لثلاث ساعات عشان يتهضم الاكل ويستفيد الجسم منو

او حسب اي وقت انتي حابه ،

عندك كثير خيارات ممكن تمشي بعدين تسوي جيليان تبع ٣٠ يوم

او افتحي في اليوتيوب تلاقي اشكال والوان من انواع الرياضات ،

نصيحة مني " لا تاخذي حبوب التخسيس جدا سيئه تسبب مشاكل في صحتك اذا مو دحين لكن في

المستقبل واصلا تاخذيها اوك ونحفتي حلو لكن بعدين راح ترجعي واكثر كمان 

وزي ماقلت تسبب مشاكل في صحتك والشي لمن يجي بسهوله راح يروح بسهوله 

لكن لما تسوي رياضه بنفسك وتنحفي وتوصلي للوزن اللي تبغي راح تحسي انك سويتي انجاز وراح تنبسطي من نفسك

:) وبس 

انشاء الله تكونو استفدتو واي سؤآل انا حاضره 

اسئلوني هنا http://ask.fm/raneem372

 وتابعوني في تويتر https://twitter.com/irjojoor واعملو ليا فولو

ولايك للصفحتي في الفيس بوك www.facebook.com/raneemRm

واشتركو في مدونتي اذا عجبتكم 

رمضان مبارك ع الجميع الله يجعلنا واياكم فيه من المقبولين ..بااي <3 :) 

واي تدوينه حابينها سواء عن طبخ او البيوتي او اي شي ثاني اكتبولي في تويتر او الاسك او هنا او حتى الفيسبوك

عادي . و ع اخر رمضان انشاءالله راح انزل بوست تنسيقات للعيد لكن ححاول افكر واخليها تكون مختلفه عن تنسيقات الصيف وبس :)

خمسة منتجات خلصتها حرجع اشتريها او لا ♥

السلام وعليكم ، 

تدوينتي لليوم حتكون عن خمسة منتجات خلصتهم واذا حرجع اشتريهم او لا 

وراح اقولكم رأي عنها  . انا قررت انو كل شهرين او ثلاثه او كل ماحسيت انو المنتجات
اللي عندي خلصت او قربت تخلص << ماتلاحظو قلت "او "كثير ،
المهم ايوا او قربت تخلص ف اسوي عنها ريفيو عشان انتو كمان تستفيدو 
وبس نبدأ :

اول شي عندي لوشن الجسم من فازلين 

 مره حلو وترطيبو كويس وريحتو كمان حلوه بصبار 

وكمان يقعد معاكي فتره مره كويسه انا عن نفسي قعد معايا تقريبا شهر ونص 

وافكر اشتري مره ثانيه بس مو نفس الريحه لا ريحه ثانيه 

اعطيه 10\10

بالنسبه لسعرو مافتكر لانو من زمان

ثاني شي اللي هوا كريم من نيفيا 

في يجي زي كذا شكلو وفي علبه صغيره

بصراحة مره ماعجبني ماحسو مره يرطب هوا لليدين والوجه والجسم

بس ابدا ماحفكر اني ارجع اشتري 

اعطيه 4/10

مزيل المناكير من بورجوا اول شي اللي ماعجبني فيه انو فيلو عطور فمع الاستمرار في استخدامه حيغمق 

المنطقة اللي حولين الظفر ثاني شي اللي ماعجبني فيه انو الاسفنجه اللي جوتو احسها شوي قاسيه 

مو لينه وثالث شي ماعجبني فيه احسو مايمسح بسرعة . والشي الوحيد اللي عجبني فيه لونو ايوا لونو حلو بينك كمان ريحتو حلوه  

بس ارجع اشتري مستحيل 

اعطيه 3/10 عشان لونو ،

كريم من جونسون انا جات فتره يدي مره سارت ناشفه خصوصا بين الاصابع

مره نشفت والشي الوحيد اللي انقذني ورجعلي يدي ناعمه هذا الكريم فإذا كانت يدك ناشفه جدا 

انصحك بهذا الكريم اتوقع انو من مكوناته البودرة ، في نوع ثاني برضو من جونسون اصغر من هذا بشويه 

دورت عليه مره مالقيته فاطريت اني اخذ هذا بس مرة ماعجبني لونو وشكلو بس انا اقولك لاتهتمي لشكلو لانو الكريم من جوا حلو مره حبيتو بس ماحرجع اشتري هوا عادي تستخدمي حتى اذا يدك مو جافه بس مادري مابغا اشتري مره ثانيه

اعطيه 7/10

واخر شي اللي هوا قناع للوجه بالتفاح استخدمتو بس مرتين ومره ماحبيتو 

احسو وسعلي وفتحلي مسامات وجهي ولمن وقفت استخدمو الحمدلله رجعت المساسمات مغلقة

هوا ماناسبني بس يمكن يناسب غيري لانو مو كل شي ناسبني ممكن يناسب غيري 

اعطيه 3/10 ،

وبقولكم شي يعني بس عشان تعرفو انا ماحب اثبت ع شي واحد احب انوع مو انوع انوع لا يعني اغيرها وماثبت ع شي واحد غير اذا جربت غيرو كثير ولقيتو احسن شي ، 

وبس انشاءالله تكونو استفدتو بااي  :) 

سولي لايك لصفحتي في الفيس بوك

www.facebook.com/raneemRm

تابعوني وسولي فولو 

https://twitter.com/irjojoor

اسئلوني 

http://ask.fm/raneem372

و اشتركو في البلوق 

حقي 

.مررررررره حكون شاكره لكم اذا دعمتوني و انشاءالله قريب راح انزل بوستات وابدأ اتفاعل معاكم
بس خليني اشغل مخي شويا وافكر ايش انزل بوستز في رمضان  :)