السلام وعليكم كيفكم ؟شخباركم؟ انشاءالله تمام
ادري مرره متاخره ليا زمان عن اخر بوست نزلتو طيب ، بوست اليوم راح يكون عن منتجات خلصتها
اذا فاكرين عملتها قبل هنا وقلتلكم اني راح اعمل هذا البوست كل ماخلص منتجات واقولكم راي فيها
طيب نبدأ :
قبل اي شي انا ماعرف اذا قلت لكم قبل نوع بشرتي او لا فراح اقول لكم ، انا بشرتي مختلطه الى دهنيه
هذي هيا كل المنتجات
اول شي مقشر من كلين اند كلير شوفو انا ماعرف هوا بايش بس بالبرتقال و حاجه ثانيه بس لاني رميت العلبه وما قرئت بايش فمعليش ، راي في انو مررره شي وااو مره حلو للتقشير اليومي ينضف البشره ويزيل الجلد الميت وانا قللي الحبوب مررره انصحكم في وكمان العبله تقعد معاكي فتره مره طويله انا قعدت معاي من شهرين الى اريعه او خمسه ، فيلو حبيبات للتقشير ، ريحتو عاديه مدري ماحسيت شي مميز بس ممكن في غيري تعجبهم الريحه ،
تقيمي لو : ١٠/١٠
هل حأرجع اشتري : يمكن بس مو هذا النوع لا الاخضر حق البشره الدهنيه
ثاني شي الغسول انا استخدمو بعد المقشر سوري اذا ماكان واضح في الصوره
، مرره شي جميل وينضف بس انا ماحسيت انو مرره تنضيفو عميق و بعد ما تستخدميهم مره حتنشف بشرتك او حتى اذا بس استخدمتي
الغسول برضو ينشف ، برضو فيلو حبيبات بس انعم واقل من المقشر ، ريحتو نفس المقشر ، وكمان اللي يعجبني في انو ضغاط بس اللي يقهر شوفو في الصوره من تحت لسا في باقي شويا من الغسول مو راضي يطلع باضغاط او حتى لمن اشيل الغطا واحاول اخرجو مايطلع ،
تقيمي لو : ٧/١٠ ، والمقشر والغسول تلاقينهم في اي سوبر ماركت او صيدليه ،
هل حارجع اشتري : لا مافكر ارجع اشتري
الشي الثالث اللي هوا تونر من كلير اسيل هوا مكتوب عليه انو يشد المسام و يحارب حب الشباب و اعتقد يزيل اللمعان موب متاكده ، راي فيه بصرااحة يابنات مره حلو وعجبني فعلا احس قلل الحبوب ولمن ماستخدمو ترجع الحبوب وكمان حسيت انو المسام انشدت بالنسبه للمعان مالاحظت فرق اما بالنسبه للتنضيف فهوا مرره ينضف من قلب، واذا ع الغطا فترا طاح وانكسر ،
تقيمي لو : ٩/١٠ لسبب انو الغطا سريع الانكسار وكمان ما ينقفل كويس
هل حارجع اشتري : ماتوقع لاني حابه اجرب شي جديد
رابع منتج كريم الليل والنهار اللي من ذا بودي شوب من مجموعة فيتامين e، اول شي اللي ع اليمين
كريم الليل مرره يعجبني ترطيبو وتمتصو بشرتي بسرعه ، اما اللي ع اليسار فهوا كريم عادي مو للنهار بس انا استخدمو في الصباح لانو اخف من حق الليل نفس الشي ترطيبو مره حلو ، مره ناسبتني الكريمات اذا حابه تحربي المجموعه بس خايفه ما تناسبك خذي الحجم الصغير ، انا هذي كفتني لشهر كامل ، هذي المجموعه مناسبه لجميع انواع البشره
، تقيمي لو : ١٠ /١٠
هل حارجع اشتري : ماعتقد في بالي كريم ثاني وماحب اثبت ع شي الا اذا مالقيت شي غيرو ناسبني
كريم 21 مره كريم حلو وترطيبو جدا جميل ويخلي ملمس البشره ناعمه وتمتصو بشرتي في دقيقتين ثلاثه
، وع فكره ذا الكريم ثقيل بمعنى الكلمه بس سهل توزيعو ع البشره ، في منو احجام انا اخذت اصغر حجم للتجربه وفعلا مره عجبني ، استخدمو في نص اليوم انضف وجهي بالتونر وبعدين استخدمو واحيانا في الصباح بعد روتين بشرتي الصباحي ، كقتني تقريبا من شهرين الى ثلاثه ، وتلاقي في كل السوبر ماركتس الصيدليات ،
تقيمي لو : ١٠ /١٠
هل حارجع اشتري : موب اكيد
كريم اليد من دوف بنات كلمه رائع قليله علي مررره يرطب من قلب وما يدبق وتمتصو البشره بسرعه
وريحتو حلوه ، قعد معاي تقريبا من شهرين الى ثلاثه اشهر ، وسعرو رخيص اتوقع ١١ ريال ،
هل حارجع : لا لانو نفس الشي في بالي كريم ثاني :)
تقيمي لو : ١٠ /١٠
مقشر القدمين من ذا بودي شوب ماراح اتكلم عنو لاني سبق واتكلمت عنو هنا
لكن بقول رأي في ، شي مرره خيالي ومره عجبني وينعش القدمين ،
تقيمي لو : ١٠ / ١٠
هل حارجع اشتري : ههههه ماعتقد لانو في بالي مقشر ثاني
وبس هذي كانت المنتجات اللي خلصتها وعطيتكم رأي فيها انشاءالله تكونو استفدتو و اي سؤال اسئلوني في
الاسك http://ask.fm/raneem372
تابعوني في تويتر : https://twitter.com/irjojoor
ولايك في اليس بوك : www.facebook.com/raneemRm
واشتركو في مدونتي مرره حكون مشكوره لكم اذا دعمتوني :) و اعتطيتوني ارائكم و اقتراحاتكم ع بوستز = تدوينات ثانيه .
باي =))
ليست هناك تعليقات:
إرسال تعليق