السلام وعليكم ، اعتذر عن التاخير بس كان لظروف .
ع اي حال بوست اليوم راح يكون زي ماهو باين في العنوان
عباره عن ريفيو لمنتجات وهل حبيتها وعجبتني وناسبتني او لا وكمان بعض المفضلات للشهور اللي فاتت .
طيب بسم الله نبدأ :
العناية بالبشرة
اول شي من اليمين اتوقع محد مايعرفه وعنده زيه فكس بلس من ماك انا ماعرفت فين احطه مع الميك اب او العنايه لكن بما
اني اسمخدمه اوقات كتونر فقلت احطه بالعنايه ، جميل يرطب ، اذا حابين اعمل ريفيو عنه وطرق استخدامها اكتبولي في الكومنتس .
غسول الوجه من كلين اند كلير وهو عبارة عن غسول رغوي يطلع رغوة ، انا بالعادة اضغط ضغطتين عشان يكفي ، حبيت تنظيفه وماينشف او يجفف البشرة بما انو بشرتي مختلطة دهنية بس ماحسيته مره ينظف وما حرجع اشتريه .
العناية بالشعر
اول شي من اليمين شامبو من فورميرلي أُورقنتس ، اسمه ماكديميا اويل او زيت الماكديميا ، مكتوب عليه انو مزيج من زيت الماكديميا و مستخلص البامبو الاستوائي ويمنح الشعر ترطيب مذهل ونعومة ، ماحسيته نعم شعري ( شعري جاف ومموج ) بالعكس كنت احس يجفف شعري زيادة ، بس اكيد انو مو اي شي ماناسبني معناته ماراح يناسبك و العكس .
ثاني كريم بالمرز للشعر مكتوب انو ( يحتوي ع فيتامين ه و زيت الجوجوبا ، وانو يصفف الشعر ويتحكم فيه وما يقسي الشعر و لا يترك فيه رواسب ) الكريم جدا ثقيل ومامزح بثقيل فعلا ثقيل يمكن زي الفازلين او اثقل يدبق شويه في اليد لكن
مايمنع انو المنتج مره عجبني صحيح ثقيل ويدبق شي مره يستفزني ، وفعلا احسه يتحكم في شعري وتنعم الشعره شويه
ماقسى الشعر سهل تسريحه شويه ، ريحنه جميلة زي البودرة ومعاها ريحه غريبة بس حلوه ، طريقة استخدامي له بعد ماخذ شاور وشعري نصف مبلل اخذ شويه مررره لا تكثري و لا شعرك بيدهن حتى اذا كان جاف ، احطه ع راحة يدي وابدا احطه ع شعري بدون الجذور بس من قدام الشعر الصغير الملفلف احط عليه وامشطه بفرشة اللي هيا حقت التسريح وبس منجد تملس اللفلفلات بس طبعا مو علي طول ، وبس
ثالث شي زيت من باراشوت يحتوي ع اربعة انواع من الزيوت اللي هيا ( زيت الزيتون وزيت السمسم و زيت اللوز وزيت جوز الهند ) ف جدا موفرة ع اني اشتري الاربعة زيوت كلها لحالها ، وطريقة استخدامي له احطه ع كل شعري من الجذور الى الاطراف واخلي نص ساعه او اكثر واغسله عادي ، ليا فتره باستخدم تقريبا مرتين بالاسبوع وفعلا لاحظت شعري خفت النفشة ترا مرره شوي خفت ، لانو اصلا الزيت مفعوله مايبان ع طول ياخذ وقت طويل عشان يبان .
واخر شي بلسم للشعر من صانسيلك من مجموعة تساقط الشعر ، البلسم ماعمل شي بس اني رطب شعري وكمان مو ذاك الترطيب الواو .
المكياج
اول شي من اليمين بودرة برونزية من نمبر ٧ اسم الدرجة هوني ، حلو اذا كنت بستخدمه كبودرة لكل وجهي لانو اشوف اللون جدا خفيف فيعطي لوك برونزي خفيف لوجهي ومايبين مره شي غامق .
اللي جمبه روجين من ريفلون اللب بتر ، هذي المجموعة جدا حابتها وطايحها بغرامها منجد ترطب واللون قوي واذا راح اللون الترطيب مايروح ، الدرجة الاولى من اليمين بيري سموذي ، لونه بينك ع موف جدا جميل يمكن وصفي يكون غلط شويه لانو اللون غريب فا انتو روحو وشوفو ، واللون الثاني كب كيك ، لونه بينك فاتح فيلو موف شويه .
اللي جمبهم مرطب بيبي ليبس من ميبيلين اسم الدرجة تشيري ، عجبني اللون و الترطيب جدا خفيف .
رابع شي جمبه بودرة برونزية من ذا بودي شوب جدا جميلة وسبق اتكلمت عنها في مفضلاتي
مفضلات سبتمبر .
خامس شي من تحت اليمين بلشر من اتش اند ام برضو سبق اتكلمت عنه في
مفضلات 2013
اسم الدرجة دازلينج بيتش .
سادس شي لوس باودر من بنفت زيرو شاين جدا عجبتني وتناسب اكيد البشره المختلطة والدهنية .
سابع شي البرونز الكريمي من شانيل من جد جدا رائعه بس مشكلته شوي ثقيل بس طبعا في نظري كذا انتي جربي وشوفي قوامه ، بس عموما البرونزر جدا عجبني وناسبني ومايبين مرره شي غامق واستخدمته كمان في مكياج العيد
، وفيله كمية كبيرة يعني ماتوقع ممكن يغلق معاكي في فتره قصيره لانو اساسا شويه منه تكفي الوجه كله .
الشمعه
جدا جميله بصراحة ماعرفت الاسم لكن هيا ريحة خشب المكتوب يعني ، ولكن انا اشوف انها ريحة عطرية من حلوة مع الخشب بس العطر طاغي علي احسها ريحه مرره مريحة مادري تريح نفسيا وجسديا .
وبس كذا خلصت بوست اليوم انشاءالله تكونو استفدتو ولو شويه
